Frederic Mistral, lo Prèmi Nobel
Autor : Centre interrégional de développement
de l'occitan (CIRDÒC)
Frederic Mistral es un dels escriveires occitans mai
renomats, sa reputacion despassa las frontièras de
França. Nais en 1830 dins un pichòt vilatge
de Bocas-de-Ròse, Malhana, situat al còr de
la Provença. E es aquela Provença natala, e
mai exactament la Provença rodanenca (pròche
de Ròse) que quitarà pas de celabrar dins
sos escriches nombroses. Son primièr libre,
Mirèio (Mirèlha en
grafia classica), que conta las amors d’una joina
Provençala, demòra uèi son
òbra mai coneguda. Publica apuèi
d’autres libres importants coma
Lou Pouèmo dóu Rose (Lo Poèma del Ròse) o un diccionari occitan-francés de granda
qualitat, Lou Tresor dóu Felibrige (Lo Tresòr del Felibrige). L’ensem de son òbra es remarcada per lo
mond entièr e obten en 1904 lo Prèmi Nobel
de literatura.
Lo felibritge e la renaissença occitana
Frederic Mistral es tanben un personatge
fòrça important per la literatura occitana
puèi qu’es a l’origina d’un dels
moviments d’autors mai importants dels sègles
XIX e XX, lo Felibritge. Aquel movement aculhirà
los autors mai importants de l’epòca e fins a
la segonda mitat del sègle XX. Es tanben per
l’intermediari del Felibritge que Frederic Mistral
tornarà introduire dins las mentalitats
l’idèia totjorn actuala de la fraternitat
entre las lengas occitana e catalana.
L’eiretatge de Frederic Mistral en Provença
Uèi, rescontrar lo nom de Frederic Mistral es
frequent en Provença, en mai de las nombrosas
carrièras e baloards que pòrtan son nom e
que li fan bona plaça dins l’imaginari
collectiu, una estatua li es dedicada en Arles e un
musèu que presenta son òbra li es dedicat
dins sa vila natala. Es tanben dins la vila d’Arles
que fonda son musèu, lo Museon Arlaten,
especializat dins las colleccions artisticas e istoricas
de Provença.