TALHIÈR E RESSORSAS

Aqueste trabalh pòrta sus las praticas ensenhairas dins las classas cooperativas e los espleches i favorisant la cooperacion e l’entre-ajuda entre pars. S’apuèja suls escriches del neurofisiologist Alain Berthoz e de pedagògs cercaires eissits de las pedagogias activas tal coma Bernard Collot, los ensenhaires cercaires de L’ICEM-Pédagogie Freinet, René Laffitte, Fernand Oury et Aïda Vasquez.

Aqueste trabalh de recèrca presenta dins una primièra partida los enjòcs istorics de la cooperacion a l’escòla : crear una societat mai justa e de ciutadans responsables e liures aprèp los masèls de la Primièra Guèrra Mondiala. Puèi, presenti los enjòcs personals que me butèron a utilisar las tecnicas Freinet e la pedagogia institucionala dins la classa dins quina ensenhi :  retrobar de sens e se sentir far partida d’un bèl projècte.

Aquesta vision convergís amb la de Celestin Freinet que parla de la classa cooperativa, capabla de restaurar « una poténcia creatritz », « un vam vital » dins la mira que l’emancipacion de l’individú e del grop posquèsson existir.

Aqueste memòri questiona a la seguida : Cossí respondre a aquestes enjòcs ? La segonda partida s’apuèja sus las observacions menadas dins doas classas primariás Tecnicas Freinet Pedagogia Institucionala (TFPI), la de Richard Lopez e la meuna.

Mantun espleches favorisant la cooperacion i son presentats e analisats : Las cenchas de color, lo foncionar en còlas de trabalh e los mestièrs. Merce a d’unes exemples, se tracha de determinar lo ròtle de l’ensenhaire, los mecanismes e los indicators que senhalan un disfoncionament dins aqueste sistem complèxe qu’es la classa cooperativa. La mesa en plaça dels espleches cooperatius somesa a un experiment pragmatic sens quin l’apoderament de la classa e doncas l’emancipacion dels escolans son impossibles.

Alavetz, lo ròtle de l’ensenhaire es d’èsser atentiu als indicators que mòstran la santat de la classa e de permetre als espleches, tecnicas e institucions d’evoluir en foncion de la vida que camina.

1